معروف تامل اور ملیالم سنیما کے سینیئر اداکار روی کمار مینن طویل علالت کے بعد 71 برس کی عمر میں چل بسے۔

بھارتی میڈیا کے مطابق، وہ کافی عرصے سے کینسر کے مرض میں مبتلا تھے اور جمعہ کی صبح چنئی کے ایک نجی اسپتال میں چل بسے۔ ان کے بیٹے نے ان کی وفات کی تصدیق کرتے ہوئے کہا کہ والد کی جدائی ایک ناقابل تلافی نقصان ہے۔

بھارت کےمعروف اداکار منوج کمار چل بسے

روی کمار مینن کا کیریئر 1967 میں شروع ہوا، لیکن انہیں شہرت ملیالم فلم ”امّاں“ سے ملی، جس کی ہدایت کاری ایم کرشنن نائر نے کی تھی۔

اس کے بعد انہوں نے تامل اور ملیالم سنیما کی سو سے زائد فلموں میں اپنی اداکاری کا جوہر دکھائے اور مختلف ٹی وی سیریلز میں یادگار کردار ادا کیے۔ ان کی آخری اسکرین کریڈٹس میں علاؤالدینم البھوتھا ولکم، آراتو، سی بی آئی 5: دی برین، اور ویتلا وششم شامل ہیں۔

شیواجی ستم کا ”سی آئی ڈی“ میں بطور اے سی پی پردیومن سفر ختم

انہوں نے اپنے کیریئر کے دوران کمل ہاسن، رجنی کانت، موہن لال، اور مموٹی جیسے بڑے اداکاروں کے ساتھ اسکرین شیئر کی اور جے سسی کمار اور کے بالاچندر جیسے لیجنڈز کی ہدایت کاری میں کام کیا۔

ٹیلی ویژن پر بھی انہوں نے سن ٹی وی پر ”آئیاندھیرا پیراوائی“ اور ”جنل: مارابو کاویتھائیگل“ جیسی سیریز میں کردار ادا کیے۔

روی کمار مینن کی آخری رسومات ہفتہ کو چنئی میں ان کی رہائش گاہ پر ادا کی جائیں گی، جہاں ان کے عزیز و اقارب، مداح، اور ساتھی فنکار انہیں ہمیشہ کے لیے الوداع کہیں گے۔

جیسے ہی ان کی وفات کی خبر سامنے آئی، سوشل میڈیا پر مداحوں اور فلمی حلقوں کی جانب سے تعزیت اور دکھ کا اظہار کیا گیا، اور ان کے فن کو ہمیشہ یاد رکھنے کی بات کی گئی۔