ایپل اپنی ہیلتھ ایپ میں ایک بڑی اپڈیٹ پر کام کر رہا ہے، اور ایک نئی رپورٹ کے مطابق، آئی او ایس 19 کے ساتھ ایک اے آئی ڈاکٹر متعارف کرایا جا سکتا ہے۔ یہ نیا فیچر صارفین کے لیے ذاتی نوعیت کا صحت سے متعلق تجزیہ اور مشورے فراہم کرے گا۔
اے آئی ڈاکٹر کیا ہوگا؟
بلومبرگ کے معروف تجزیہ کار مارک گورمین کے مطابق، ایپل اپنی ہیلتھ ایپ میں ایک ورچوئل میڈیکل اسسٹنٹ شامل کر رہا ہے، جو صارفین کے صحت کے ڈیٹا کا تجزیہ کر کے حسبِ ضرورت مشورے دے گا۔ یہ AI ڈاکٹر iPhone اور Apple Watch سے اکٹھا کیے گئے ڈیٹا جیسے دل کی دھڑکن، نیند کے معمولات، اور جسمانی سرگرمیوں کو مدِنظر رکھے گا اور مشورے دے گا۔
ایپل نے آئی فون 14 اور ایس ای کی فروخت بند کردی
ایپل نے طبی ماہرین کو بھی شامل کر لیا
اس اے آئی ڈاکٹر کو زیادہ درست اور مؤثر بنانے کے لیے، ایپل نے حقیقی ڈاکٹرز اور طبی ماہرین کی خدمات حاصل کی ہیں۔ ان میں نیند، غذائیت، جسمانی تھراپی، دل کی صحت، اور ذہنی صحت کے ماہرین شامل ہیں، جو اے آئی کو بہتر بنانے میں مدد کر رہے ہیں۔
ایپل کی اس نئی ہیلتھ ایپ کا اندرونی کوڈ نام ”پراجیکٹ ملبیری“ رکھا گیا ہے، جو آئی او ایس 19 کے ساتھ متعارف کرائی جائے گی۔ اس ایپ میں ایک نیا اے آئی ہیلتھ کوچ ہوگا جو صارفین کو فٹنس، غذائیت، اور مجموعی صحت کو بہتر بنانے کے لیے تجاویز دے گا۔
نئی فوڈ ٹریکنگ فیچر بھی شامل
ایک اور بڑی اپڈیٹ کے طور پر، ایپل اپنی ہیلتھ ایپ میں فوڈ ٹریکنگ کا فیچر بھی شامل کر رہا ہے۔ اس سے صارفین اپنی روزمرہ کی خوراک کو لاگ کر سکیں گے، جبکہ اے آئی اس پر غذائی تجزیہ کرے گا اور بہتر خوراک کے مشورے دے گا۔
ایپل کا فولڈ ایبل آئی فون: ڈیزائن، بیٹری اور پائیداری کی تفصیلات لیک
ایپل کے اندرونی ذرائع کے مطابق، اس اے آئی ہیلتھ کوچ کو کچھ ملازمین ’ہیلتھ+‘ کے نام سے پکار رہے ہیں۔ لیکن ابھی تک واضح نہیں ہوا کہ یہ ایک فری فیچر ہوگا یا سبسکرپشن پر مبنی سروس۔
آئی او ایس 19 میں شامل ہونے والی اس اے آئی ڈاکٹر ٹیکنالوجی کے ذریعے ایپل کا ہدف صحت سے متعلق مزید جدید سہولیات فراہم کرنا ہے، جس سے صارفین اپنی صحت کو بہتر انداز میں مانیٹر اور مینیج کر سکیں گے۔
