بھارتی اداکارہ حنا خان، جو اس وقت اسٹیج 3 بریسٹ کینسر کے ساتھ جنگ لڑ رہی ہیں، نے رمضان کے مقدس مہینے میں عمرہ کی سعادت حاصل کر کے ایک روحانی سفر کا آغاز کیا۔
انہوں نے اپنے انسٹاگرام اکاؤنٹ پر اس سفر کی تصاویر اور ویڈیوز شیئر کیں، جو فوراً ہی وائرل ہوگئیں۔ ان تصاویر میں وہ سعودی عرب میں حرم شریف کے قریب دعاؤں میں مشغول نظر آئیں، جس پر مداحوں نے ان کی صحتیابی کے لیے دعائیں کیں۔
حنا خان نے اپنی پوسٹ کے کیپشن میں لکھا، ’’دل میں جو آرزو تھی، اللہ نے اسے قبول کرلیا۔ اللہ کئ شکر گزار ہوں کہ مجھے اپنے در پر بلایا، اور اب میری دعائیں یہ ہیں کہ اللہ مجھے جلد صحتیاب کرے۔‘‘
ان کی یہ عبارت ان کے روحانی سفر کی گہرائی اور ایمان کا مظہر تھی۔ ان کے مداحوں نے اس پوسٹ پر کمنٹس کی بوچھاڑ کردی، جن میں سب نے ان کی صحت کی دعا کی اور ان کے حوصلے کی تعریف کی۔
اداکارہ نے رمضان کے دوران اپنے بھائی کے ساتھ گزارے گئے لمحات کی خوشگوار یادیں بھی شیئر کیں، جن میں سعودی عرب میں افطار اور سحری کے مناظر شامل تھے۔
حنا خان نے اپنی انسٹاگرام اسٹوریز میں لکھا، ’’رمضان کا یہ مبارک مہینہ میرے لیے بہت خاص ہے، سحری سے افطاری تک کا یہ خوبصورت سفر الحمدللہ گزرا۔ دعاؤں میں یاد رکھیے گا۔‘‘
یاد رہے کہ گزشتہ سال جون 2024 میں حنا خان نے اپنے مداحوں کو بتایا تھا کہ ان میں اسٹیج 3 بریسٹ کینسر کی تشخیص ہوئی ہے۔ اس وقت اداکارہ نے اپنے مداحوں سے کہا تھا، ’’میں اس بیماری کے خلاف مضبوط اور پُرعزم ہوں، اور میں نے اپنا علاج شروع کر لیا ہے۔‘‘
ان کا یہ عزم اور حوصلہ ان کے مداحوں کے لیے ایک متاثر کن پیغام ہے۔ انہوں نے اپنے مداحوں سے پرائیویسی کی درخواست کی تھی، ساتھ ہی ان کی محبت اور دعاؤں کے لیے شکریہ بھی ادا کیا تھا۔
حنا خان اپنی صحت کی مسلسل اپڈیٹس شیئر کرتی رہتی ہیں، اور ان کی جدو جہد اور ہمت کو مداحوں کی طرف سے بے شمار دعائیں اور محبت ملتی ہیں۔ ان کی کینسر کے خلاف لڑائی اور روحانی سفر دونوں ہی ان کے مداحوں کے لیے ایک طاقتور اور امید کا پیغام ہیں، جو ان کے حوصلے کو بلند کرنے کا باعث بنے ہیں۔
