ایلو سانگوئینالیس، جسے صومالی ریڈ ایلو یا ’ریڈ ایلو ویرا‘ جیل بھی کہا جاتا ہے، ایلو ویرا جیل کے بہتر متبادل کے طور پر توجہ حاصل کر رہا ہے۔ تاہم ماہرین اس سے متفق نظر نہیں آتےہیں۔

سالہا سال سے اگر کوئی ایسی پروڈکٹ ہے جو تقریباً ہر میک اپ بیگ میں لازمی رہی ہے (چاہے آپ خوبصورت نظر آنے کی شوقین ہوں یا نہیں)، تو وہ ایلو ویرا جیل ہی ہونی چاہیے۔

ایلوویرا اپنی ہائیڈریٹنگ اور اینٹی سوزش خصوصیات کے لیے جانا جاتا ہے، اور اسے آیورویدک اور ایلوپیتھک ماہرین دونوں نے منظور کیا ہے، ایلو ویرا نے خوبصورتی کی صنعت میں کافی شناخت بنائی ہے۔

لیکن اگر ہم آپ کو یہ بتائیں کہ ایلو ویرا کا ایک قریبی کزن ہے، جو سرخ رنگ میں پایا جاتا ہے، اور کہا جاتا ہے کہ اس میں ایلو ویرا کے مقابلے میں ”22 گنا“ زیادہ شفا بخش خصوصیات ہیں اور یہ افریقی صحراؤں کا باسی ہے؟ یہ یقیناً دلکش لگتا ہے،لیکن کیا یہ درست ہے؟

درحقیقت، یہی وہ بات ہے جسے کئی بیوٹی برانڈز ’ریڈ ایلو ویرا‘ کے نام سے مارکیٹ کر رہے ہیں۔ تاہم، اس جزو کے بارے میں جو معلومات دی جا رہی ہیں، وہ صرف جزوی طور پر سچ ہیں۔

سرخ رنگ کی ایلو ویرا کی ایک قسم موجود ہے، جو صومالیہ کے ہارن آف افریقہ میں پائی جاتی ہے، لیکن یہ صرف 2019 میں دریافت ہوئی تھی۔

ماہرینِ جلد کے مطابق، اس نام پر جو مصنوعات فروخت کی جا رہی ہیں، وہ ممکنہ طور پر ایک دھوکہ ہو سکتی ہیں۔ اس کی شفا بخش خصوصیات کے دعوے ابھی تک ثابت نہیں ہوئے ہیں، اور صارفین کو محتاط رہنے کی ضرورت ہے۔

آپ کو ”سرخ ایلوویرا“ دیکھنے کو مل سکتی ہے، جو کہ زیادہ دھوپ کی وجہ سے معمول کی ایلوویرا پودے کا سرخ رنگ اختیار کر لیتی ہے۔ ڈاکٹرزکا کہنا ہے کہ ان پودوں کے فوائد بالکل معمول کی ایلوویرا جیسے ہی ہیں، ان میں کوئی خاص بات نہیں ہے۔

ڈاکٹرز یہ بھی کہتے ہیں کہ سرخ رنگ کے پھل اور سبزیاں عام طور پر اینٹی آکسیڈنٹس جیسے لائیکوپین اور وٹامن سی سے بھرپور ہوتی ہیں۔ یہ غذائی اجزاء جلد کو بڑھاپے اور سورج کی شعاعوں سے ہونے والے نقصان سے بچانے میں مدد دیتے ہیں، کولیجن کی پیداوار بڑھاتے ہیں، اور جلد کو صحت مند رکھتے ہیں جس سے جھریاں کم ہوتی ہیں۔

ان کھانوں میں سوزش کو کم کرنے کی خصوصیات ہیں جو مہاسوں، ستخی اور جلن کو دور کرنے میں مدد دیتی ہیں۔ اسی طرح، سرخ ایلو ویرا اپنے رنگ کی وجہ سے یہ فوائد دے سکتا ہے، لیکن اس کی تصدیق کے لیے مزید تحقیقات کی ضرورت ہے،“ ڈاکٹرزمزید کہتے ہیں۔

ماہرین تجویز کرتے ہیں کہ اصل سبز ایلو ویرا کا استعمال کیا جائے، جس کے فوائد سائنسی تحقیق سے ثابت ہیں، جیسے:

جلنے کا علاج

تحقیق سے یہ ثابت ہوا ہے کہ ایلو ویرا جیل جلنے کی جگہ پر لگانے سے شفا یابی کی رفتار تیز ہوتی ہے اور درد میں کمی آتی ہے۔

جلد کی بیماریوں میں فائدہ

مختلف تحقیقات کے مطابق، ایلو ویرا ہرپس سمپلیکس، لائیکن پلانس اور چنبل جیسی بیماریوں میں مددگار ثابت ہو سکتا ہے۔

موئسچرائزنگ اور اینٹی جھریوں کے اثرات

ایک مطالعے میں یہ بھی پتا چلا کہ ایلو ویرا جیل کے استعمال سے کولیجن کی پیداوار میں اضافہ ہوتا ہے اور 45 سال سے زائد عمر کی خواتین کی جلد کی لچک بہتر ہوتی ہے۔

زخموں کی شفا یابی

ایلو ویرا میں ایسے قدرتی تیزاب ہوتے ہیں جو جلد کے زخموں اور السر کو ٹھیک کرنے میں مدد دیتے ہیں۔

اینٹی سوزش اثرات

ایلو ویرا جسم میں سوزش کو کم کرنے میں مددگار ثابت ہوتا ہے، جس سے زخموں کی سوجن میں کمی آتی ہے اور انفیکشن سے صحت یابی کی رفتار تیز ہوتی ہے۔

گٹھیا اور جوڑوں کا درد

2010 کے ایک مطالعے میں یہ نتیجہ نکلا ہے کہ روزانہ ایلو ویرا کا استعمال گٹھیا کی علامات کو کم کر سکتا ہے اور ہاضمہ کی صحت میں بھی بہتری لا سکتا ہے۔

اگر آپ نے سرخ ایلو ویرا کے فوائد سنے ہیں اور اسے آزمانے کا سوچ رہی ہیں تو رک جائیں! اصل سبز ایلو ویرا کا استعمال کریں، جب تک کہ آپ کو اس سے الرجی نہ ہو۔